វៀតណាម៖ គ្រូបង្វឹកក្រុមបាល់ទាត់ជម្រើសជាតិវៀតណាម លោក Philippe Troussier ត្រូវបានបណ្ដេញចេញពីតំណែងភ្លាមៗ ក្រោយលោកបានដឹកនាំក្រុមជម្រើសជាតិវៀតណាម បរាជ័យទល់នឹងក្រុមជម្រើសជាតិឥណ្ឌូណេស៊ី ៣-០ នៅលើទឹកដីកីឡដ្ឋាន My Dinh Stadium របស់ខ្លួន ក្នុងការប្រកួតវគ្គជម្រុះ FIFA World Cup ២០២៦។ នេះបើតាមការប្រកាសរបស់សហព័ន្ធបាល់ទាត់វៀតណាមកាលពីយប់មិញនេះ។ 

បើតាមប្រភពដដែលបញ្ជាក់ថា គ្រូបង្វឹកសញ្ជាតិបារាំងដែលទើបចូលមកដឹកនាំក្រុមកាលពីឆ្នាំ២០២៣រូបនេះ  ត្រូវបានជូនដំណឹងភ្លាមៗអំពីការបញ្ចប់កុងត្រារបស់លោក ក្រោយបរាជ័យការប្រកួតនៅទឹកដីទីក្រុងហាណូយ ដែលជាបរាជ័យផ្ទួនៗទល់នឹងក្រុមឥណ្ឌូណេស៊ី ដែលធ្វើឱ្យបច្ចុប្បន្នក្រុមជម្រើសជាតិវៀតណាមកំពុងឈរនៅចំណាត់ថ្នាក់លេខ៣ ក្នុងពូល F នៃវគ្គជម្រុះ World Cup។ 

គួរបញ្ជាក់ថា វៀតណាមពុំដែលមានប្រវត្តិបង្ហាញខ្លួនក្នុងការប្រកួតជុំចុងក្រោយនៃព្រឹត្តិការណ៍ FIFA World Cup នោះទេ។ យ៉ាងណាមិញ ផ្អែកលើការកែប្រែរូបមន្ត និងកៅអីសម្រាប់ប្រទេសក្នុងទ្វីបអាស៊ីកើនដល់ ៨កៅអីសម្រាប់ព្រឹត្តិការណ៍ FIFA World Cup វៀតណាមហាក់មានជំនឿចិត្តខ្ពស់ថា លោក Philippe Troussier ដែលជាអតីតគ្រូបង្វឹកជម្រើសជាតិជប៉ុនរូបនេះ  អាចនឹងនាំវៀតណាមឱ្យទទួលបានកៅអីបង្ហាញខ្លួននៅ World Cup ជាលើកដំបូងរបស់ខ្លួនបាន។ 

យ៉ាងណាក្ដី បរាជ័យផ្ទួនៗរបស់វៀតណាមទល់នឹងឥណ្ឌូណេស៊ីនេះមានន័យថា វៀតណាមត្រូវតែធ្វើការងារធ្ងន់ពោលគឺត្រូវយកឈ្នះហ្វីលីពីន និងក្រុមខ្លាំងអ៉ីរ៉ាក់ជាដាច់ខាត រួមជាមួយការរំពឹងថាឥណ្ឌូណេស៊ី ធ្វើមិនបានល្អក្នុងការប្រកួតដែលនៅសេសសល់របស់ពួកគេ។ បច្ចុប្បន្ននេះ អ៉ីរ៉ាក់គឺជាក្រុមដែលក្ដាប់បានមួយកៅអីទៅវគ្គបន្តរួចទៅហើយ ពោលគឺឆ្លងកាត់ ៤ប្រកួតក្នុងពូល F ឈ្នះទាំង ៤ និងមាន ១២ពិន្ទុក្នុងដៃ តាមពីក្រោយដោយឥណ្ឌូណេស៊ីមាន ៧ពិន្ទុក្នុងដៃ៕